Женската сениорска екипа на Истатов Кул продолжува со подготовки за новата натпреварувачка сезона и настапот во најсилната македонска лига.

Екипата предводена од Кирил Изов до овој момент одигра три контролни натпревари, на кои оствари два порази и една победа. Првиот натпревар на Истатов Кул беше против екипата на Саса, актуелен освојувач на Купот, како и двократен Шампион на нашата земја. Овој натпревар кој се одигра во Каменица заврши со триумф на противникот со резултат 2:8. За нашиот состав, стрелци на головите беа Бојана Петкова и Кристина Петрушевска.

По овој натпревар заминавме во Дојран, каде го одработивме главниот дел од подготовките. Екипата имаше можност да биде заедно, да се запознаат што подобро играчите, да се воигрува тимот, да се работи на физичката и тактичката подготовка и да се крева формата како одминува периодот. Подготовките во Дојран ги финиширавме со уште еден пријателски натпревар против екипата на Саса, кој повторно го добија девојките од Каменица со резултат 0:7.

Тренинзите продолжуваат на Цементарница, а во текот на вчерашниот ден гостувавме во Тетово кај екипата на Шкендија, со која имавме тест натпревар. Прв триумф за екипата предводена од Кирил Изов, која славеше со резултат 0:2. Бојана Петкова и Кристина Петрушевска успеаа да ја затресат противничката мрежа.

Во меѓувреме, Истатов Кул известува дека се засили со Верица Колевска, репрезентативен голман кој пристигна од екипата на ЖФК Скопје, која треба да ја засили конкуренцијата на оваа позиција.

Останува да работиме и да се подготвуваме за стартот на сезоната во првата женска лига, кој е предвиден за 9.септември.