Со висока победа стартуваше новата сезона во Регионалната Скопска Лига и за генерацијата 2008. Избраниците на Горан Тодоровски со резултат 9:0 беа подобри од екипата на Аеродром 2018.

Тренерот Тодоровски стартуваше со следниве 11-сетмина: Ангел Цветевски, Драган Лазаров, Мартин Гоџо, Михаил Алексов, Андреј Николовски (К), Теодор Велковски, Аган Демир, Трајче Талевски, Ведран Арнаудов, Филип Димковски и Трајче Костадинов. 

Самиот резултат говори за случувањата на теренот и за разликата во квалитет на двете екипи. Теодор Велковски во 14 минута ја навести голеадата на овој натпревар за 1:0, а истата ја продолжи Мартин Гоџо кој во 27 минута донесе предност од 2:0, за само две минути подоцна со голот на Трајче Костадинов да имаме предност од 3:0. Резултатот 4:0 на полувреме со својот прв гол го постави Трајче Талевски.

Избраниците на Тодоровски продолжија со офанзивна игра и во вториот дел од натпреварот, што резултираше со нови погодоци во противничката мрежа. На самиот старт на вториот дел, Теодор Велковски го постигна и својот втор гол и зголеми на 5:0, додека втор гол постигна и Трајче Талевски за предност од 6:0. До крајот на натпреварот постигнавме уште три гола, истите беа дело на Трајче Талевски со нови два гола и еден за Ведран Арнаудов за конечни 9:0 на овој натпревар од 1.коло во Регионалната Скопска лига за повозрасни петлиња.

Играа уште и Лука Аврамовски и Леон Ангелески.